Аталмыш мақалада жасөспірімдердің психосоматикалық денсаулығын диагностикалауға арналған ағылшын тіліндегі SCL_EN (Somatic Complaints List) әдістемесін қазақ тіліне мәдени-лингвистикалық бейімдеу және психометриялық валидизациялау нәтижелері қарастырылады.

Зерттеудің мақсаты – қазақтілді жасөспірімдер іріктемесінде SCL_EN сауалнамасының сенімділігі мен валидтілігін эмпирикалық тұрғыдан дәлелдеу. Зерттеуге жалпы білім беретін мектептердің 472 оқушысы қатысты. Әдістеменің ішкі келісімділігі альфа Кронбах критерийі арқылы тексерілді, ал құрылымдық біртектілігін бағалау үшін пункт-қорытынды корреляциясы қолданылды. Психометриялық талдау нәтижесінде альфа Кронбах критерийі жоғары мәні (0,840) тіркеліп, әдістеменің ішкі жүйелілігі мен сенімділігі дәлелденді. Түзетілген пункт-қорытынды корреляциясының мәндері (0,329 - 0,664) әрбір сұрақтың жоғары дискриминативтілігін көрсетті. Сипаттамалық статистика мәліметтері жасөспірімдерде созылмалы шаршаңқылық пен бас ауруы белгілерінің басым екенін нақтылады.

Аталмыш зерттеу нәтижелері SCL_EN әдістемесінің қазақша нұсқасын психологиялық тәжірибе мен ғылыми зерттеулерде қолданудың әдіснамалық негізділігін растайды.