Зерттеудің мақсаты – университет студенттеріндегі перфекционист тұлғалық қасиеті олардағы академиялық прокрастинация мен өмірге қанағаттануын болжайтынын анықтау. Зерттеуге Абай атындағы Қазақ ұлттық педагогикалық университетінің 90 студенті қатысты. Деректер тұлғаның перфекционистік қасиетін зерттеуге арналған көп өлшемді перфекционизм шкаласы, академиялық прокрастинацияны зерттеу үшін студенттердегі прокрастинацияны бағалау шкаласы және өмірге қанағаттанушылықты зерттеу үшін өмірге қанағаттану шкаласының көмегімен жиналды. Зерттеу нәтижелері бойынша регрессиялық талдау жүргізілді. Талдау қорытындысына сәйкес, тұлғаның өзіне бағдарланған перфекционистік қасиеті академиялық прокрастинация мен өмірге қанағаттануды айтарлықтай болжайтыны анықталды. Сонымен қатар, өзгеге бағытталған және қоғам анықтаған перфекционизм академиялық прокрастинация мен өмірге қанағаттануды болжаған жоқ.