Қазіргі заманда білім беру жүйесі тек академиялық білім берумен шектелмей, оқушының тұлғалық дамуын, психологиялық тұрақтылығын қамтамасыз ету міндетін де алға қойып отыр. Бұл ретте білім беру үрдісінде оқушыларды психологиялық қолдау көрсету – мектеп педагогтары мен психологтарының негізгі бағыттарының бірі ретінде өзектілікке ие. Психологиялық қолдау – оқушылардың әлеуметтік-психологиялық бейімделуіне, өзін-өзі тануына, өз мүмкіндіктерін тиімді пайдалануға және тұлғалық дамуында кездесетін қиындықтарды жеңуге ықпал ететін мақсатты және жүйелі қызмет. Зерттеулер көрсеткендей, білім беру мекемелерінде жүйелі ұйымдастырылған психологиялық қолдау оқу мотивациясының жоғарылауына, оқушылардың өз-өзіне сенімділігінің артуына және қарым-қатынас дағдыларының дамуына оң әсер етеді.

Бұл мақалада психологиялық қолдау ұғымының мазмұны, оның білім беру процесіндегі орны, түрлері және ұйымдастыру жолдары қарастырылады. Сонымен қатар, оқушылардың жас ерекшеліктеріне байланысты психологиялық қолдау көрсету ерекшеліктері, мектеп психологы мен мұғалім арасындағы өзара іс-әрекеттің тиімді формалары сипатталады. Мақала барысында жалпы білім беретін мектептерде жүргізілген эмпирикалық зерттеулер нәтижелері келтіріліп, психологиялық қолдаудың практикалық маңыздылығы дәлелденеді. Мақсат – мектеп ортасында психологиялық жайлылықты қамтамасыз ету арқылы оқушылардың әлеуетін ашу, олардың толыққанды тұлға болып қалыптасуына ықпал ету. Бұл зерттеу білім беру саласындағы мамандарға, педагогтерге, мектеп психологтарына, сондай-ақ ата-аналарға да пайдалы бола алады.