Мақалада жоғары білім беру жағдайында болашақ педагог-психологтардың soft skills дағдыларын интегративті психотехнологиялар арқылы дамыту мәселесі қарастырылады. Зерттеудің өзектілігі психологиялық-педагогикалық бейіндегі мамандарды кәсіби даярлауға  қойылатын талаптардың артуымен, сондай-ақ кәсіби қызметке табысты бейімделуді қамтамасыз ететін икемді құзыреттерді қалыптастыру қажеттілігімен айқындалады.

Зерттеудің мақсаты – интегративті психотехнологияларды қолданудың теориялық негіздерін айқындау және олардың болашақ педагог-психологтардың soft skills дағдыларын дамытудағы тиімділігін эксперименттік тұрғыдан тексеру. Зерттеу М. Әуезов атындағы Оңтүстік Қазақстан университетінде «Педагогика және психология» білім беру бағдарламасының 40 студентінің қатысуымен жүргізілді. Зерттеуде В.В. Синявский мен Б.А. Федоришиннің коммуникативтік және ұйымдастырушылық бейімділіктерді анықтау әдістемесі, Н. Холлдың эмоционалдық интеллектті диагностикалау әдістемесі және Connor–Davidson Resilience Scale (CD-RISC) психологиялық тұрақтылық шкаласы қолданылды.

Қалыптастырушы эксперимент барысында тренингтік әдістерді, кейс-технологияларды, коучингтік тәсілдерді, рефлексиялық тәжірибелерді және кәсіби жағдаяттарды модельдеу әдістерін қамтитын арнайы бағдарлама жүзеге асырылды. Зерттеу нәтижелері эксперименттік топ студенттерінің коммуникативтік дағдыларының, эмоционалдық интеллектісінің және стресске төзімділігінің статистикалық тұрғыдан мәнді артқанын көрсетті. Алынған нәтижелер болашақ педагог-психологтардың кәсіби даярлығында интегративті психотехнологияларды қолданудың тиімділігін дәлелдейді.