Мақалада зейінді дамыту практикасының (Mindfulness) педагогтердің қызметіне байланысты туындайтын стрессті азайтуға ықпалы қарастырылды. Зейінділік бойынша тренингтен өткен мұғалімдердің өзін-өзі бағалау ұпайларын бақылау тобындағы мұғалімдермен салыстыру арқылы зейінді дамыту практикасының мектеп мұғалімдеріне әсері зерттелді. Зерттеуге 87 мұғалім қатысты. Оның 44-і бақылау тобында, ал 43-і эксперименттік топтың мүшелері болды. Кирк Уоррен Браун және Ричард Райанның «Саналы зейін шкаласы» ((MAAS)) қолданылып, алынған  деректер Пирсонныңc² критерийі арқылы талданды. Нәтижесінде зейінді дамыту практикасының педагогтердің күйзелісін азайтуға ықпал ететіні анықталды. Егер зейінділік практикалары білім беру саласында педагогтердің тәжірибесінде жүйелі қолданысқа енгізілсе,  онда педагогтердің стресске түсу деңгейін төмендетеді және күнделікті өмір сапасын жақсартуға көмектеседі деген қорытынды жасалды.