Бұл мақалада Қазақстан Республикасының жоғары білім беру жүйесінде болашақ педагог-психологтардың конструктивті қарым-қатынас дағдыларын дамыту мәселесі қарастырылады. Конструктивті қарым-қатынас — педагогикалық және психологиялық жұмыстың тиімділігін қамтамасыз ететін кәсіби құзыреттіліктің маңызды компоненті ретінде қарастырылады. Ғылыми әдебиеттерге жүргізілген теориялық талдау көрсеткендей, болашақ мамандардың коммуникативтік қабілеттерін дамытудың жеткіліксіздігі кәсіби қиындықтарға, күйзеліске және жанжалдарға әкелуі мүмкін. Мақалада психодрама әдісін қолданудың ғылыми негізі ұсынылады. Бұл әдіс эмпатияны, белсенді тыңдауды, диалог орнату мен рефлексияны дамытуға септігін тигізеді. Зерттеу М. Әуезов атындағы Оңтүстік Қазақстан университетінің  бакалавриат студенттерімен жүргізілді. Эксперимент нәтижелері психодраманың конструктивті қарым-қатынасқа оң әсер ететінін көрсетті. Сондай-ақ, білім беру процесіне психодрамалық жаттығуларды енгізу бойынша тәжірибелік ұсыныстар беріледі. Мақала педагогика мен психология саласындағы зерттеушілер мен оқытушылар үшін пайдалы болуы мүмкін.